षट्कोण आर्ट्सले निर्माण गरेको ‘जात्रा’को तेस्रो सिक्वेलको रूपमा निर्माण भएको फिल्म ‘महाजात्रा’ प्रदर्शनको आठौँ सातामा प्रवेश गरेको छ । फिल्मले शनिबार प्रदर्शनको ५१ औँ दिनको यात्रा समेत तय गर्दै छ ।
गत चैत ९ गतेदेखि सार्वजनिक प्रदर्शन सुरु गरेको फिल्मले काठमाडौँ उपत्यकाका क्युएफएक्स, आइएनआई सिनेमाज, एफक्युब सिनेमाज, वान सिनेमाज, बिएसआर मुभिज, रञ्जना सिनेप्लेक्स, सिके सिनेमाज, विग मुभिज र मोफसलमा नेपालगञ्जमा रहेको सिनेरोयलमा ५१ औँ दिनको यात्रा पार गर्न लागेको हो ।
फिल्मले स्वदेश तथा अन्तर्राष्ट्रिय बजार समेत राम्रो कमाइ गरेको छ । ‘महाजात्रा’ले ५१ औँ दिनको यात्रा तय गर्नु सम्पूर्ण फिल्म उद्योगकै लागि खुसीको खबर रहेको निर्माता म्याक्स दीपेश खत्रीले बताए । ‘हामीलाई यो सफलताले अझैँ दायित्व बोध भएको छ । आगामी दिनमा दर्शकको भरोषालाई बढाउने र विश्वास टुट्न नदिने गरी काम गर्ने छौँ निर्माता खत्रीले भने ।
प्रदीप भट्टराईको लेखन तथा निर्देशनमा तयार भएको फिल्ममा हरिवंश आचार्य, वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय छ ।
म्याक्स दीपेश खत्री र यज्ञश्वर पौडेलले संयुक्त रूपमा निर्माण गरेका फिल्मका कार्यकारी निर्माता रवीन्द्रसिंह बानियाँ हुन् ।
