यही वैशाख १८ गतेदेखि सार्वजनिक प्रदर्शनमा आउने फिल्म ‘खजुरे ब्रो’ को ग्राण्ड प्रिमियर सम्पन्न भएको छ । मंगलवार सांझ राजधानी काठमाडौँमा ग्राण्ड प्रिमियर सम्पन्न भएको हो ।
सुरज सुनुवारको लेखन तथा निर्देशनमा बनेको फिल्मले साथीको सम्बन्ध र पैसाले श्रीमान श्रीमतीको सम्बन्धमा ल्याउने उतार चढावको कथा बोल्छ । चलचित्र हेर्ने सम्पूर्णले चलचित्र हेरुञ्जेल पूर्ण मनोरंजन लिएको प्रतिक्रिया दि ए। फिल्मको आज बुधवार धरानमा प्रिमियर हुँदैछ ।
काठमाडौंसँगै दार्जलिङ, धरान र इटहरीमा फिल्मको छायांकन भएको हो । चलचित्रमा धरानको स्थानीय कला तथा मौलिक लवजलाई बिसेष तरिकाले प्रस्तुत गरिएको छ ।
रेअर राइ र नीति शाह मुख्य भूमिकामा रहेको फिल्ममा नवीन मानन्धर, महेश त्रिपाठी, विनीता थापा, पुष्कर कार्की, प्रकाश भुजेल, मनिष राउत, प्रेम सुब्बा, सुजाता राई, दीपचन्द्र राई, शान्तिला तामाङ लगायतको अभिनय रहेको छ ।
दिव्य दृश्य इन्टरटेन्मेन्टले मान्द्रो प्रोडक्सन र मल्टी प्रपोज प्रालिसँगको सहकार्यमा फिल्म निर्माण गरेको हो । नवीन मानन्धर र सुरज सुनुवार निर्माता रहेको फिल्ममा सुनिल श्रेष्ठ, अनिल मानन्धर र पिकेश मानन्धर सहनिर्माताको रुपमा जोडिएका छन् ।
रोहित रत्नको आरआर फिल्मस्ले फिल्म वितरणको जिम्मा लिएको छ । डायमण्ड उप्रेती कार्यकारी निर्माता रहेको ‘खजुरे ब्रो’ शिशिर विशंखेले खिचेका हुन् । मित्र डी गुरुङको सम्पादन, अनमोल गुरुङको संगीत समावेश छ ।
