अब हिमालय टेलिभिजनमा सिरियल ‘बुहारी’ प्रसारण हुने भएको छ । साथै, यो श्रृंखलाको डिजिटल स्ट्रिमिङ ओएसआरको युट्युव च्यानलमा हुनेछ । सोमबार आयोजित पत्रकार सम्मेलनमा सिरियलका निर्माताले ओएसआर डिजिटलसँग सम्झौता गरे । सोही कार्यक्रममा हिमालय टिभी र ओएसआर डिजिटलसँग अलग सम्झौता पनि भयो ।
हिमालय टिभीका प्रबन्ध निर्देशक श्याम कँडेल, ओएसआर डिजिटलका प्रमुख ओमप्रकाश अग्रवाल र सिरियलका निर्माता तथा निर्देशक रामचन्द्र बोहराले ती सम्झौताहरुमा हस्ताक्षर गरे ।
यो सिरियल शुक्रबार राती ९ बजे हिमालय टिभीमा प्रसारण हुनेछ भने सोही समयमा ओएसआरको युट्युव च्यानलमा स्ट्रिमिङ हुनेछ । सिरियलका निर्मातासँग २ वर्षको लागि सम्झौता भएको हो ।
बुहारीको रुपमा महिलाले गर्ने संघर्ष र संवेदनाको कथावस्तु रहेको सिरियलमा रामचन्द्र बोहरा, अनिता बैजु, लक्ष्मी गिरी, देशभक्त खनाल, विजय देउजा, लक्ष्मणविक्रम बस्नेत, विद्या कार्की, महेश जंग थापा लगायतको अभिनय छ ।
निर्माता तथा निर्देशक बोहराले सिरियलको १७३ सम्मको एपिसोड ‘बुहारी अफिसियल’ युट्युव च्यानलमा रिलिज गर्दै आएका थिए । १७४ औं भागदेखि टिभी र ओएसआरमा आउनेछ ।
