यही चैत्र ९ गते बाट प्रदर्शनको तयारीमा रहेको फिल्म ‘महाजात्रा’को अग्रीम टिकट बुकिङ खुल्ला गरिएको छ । सफल ब्राण्डको तेस्रो सिक्वेल र उच्च प्रचारले फिल्मलाई हल सञ्चालकले बम्पर व्यापारको विश्वास सहित उच्च शो प्रदान गरेका छन् ।
फिल्मले देशकै ठुलो मल्टिप्लेक्स चेन क्युएफएक्सले मात्रै आफ्ना देशभरका स्क्रिनमा ७० शो पाएको छ । यता देशको दोस्रो ठुलो मल्टिप्लेक्स चेन आईएनआई सिनेमाजले १५ शो दिएको छ । यस्तै, बिग मुभिजले ५ शो, वान सिनेमाज्ले १६ शो, एफक्युबले ७ शो, बिएसआर मुभिजले ५ शो, रञ्जना सिनेप्लेक्सले ९ शो, सिके सिनेमाजले ७ शो, क्युज सिनेमाज्ले ९ शोज दिएका छन् ।
प्रदीप भट्टाराई लिखित तथा निर्देशित फिल्ममा विपिन कार्की, रविन्द्रसिंह बानियाँ र रविन्द्र झाको शीर्ष भूमिका छ । फिल्ममा हरिवंश आचार्यले खलपात्रको भूमिका निर्वाह गरेका छन् । वर्षा राउत, प्रवीण खतिवडा, शिशिर बाङ्देल, दिव्यदेव पन्त, गौमाया गुरुङ, प्रकाश घिमिरे र पुष्कर गुरुङको फिल्ममा अभिनय छ ।
म्याक्स दीपेश खत्री र यज्ञश्वर पौडेलको संयूक्त निर्माण रहेको फिल्मको डायस्पोरा प्रदर्शन अधिकार एमएसएम इन्टरटेनमेन्टले लिएको छ ।
जित बहादुर रुवाली एसोसियट निर्देशक रहेको फिल्ममा पुरुषोत्तम प्रधान छायाँकन, कुमार महर्जन द्वन्द्व निर्देशन, कविराज गहतराज नृत्य निर्देशन तथा आशिष अविरल संगीत, रूपकप्रताप अधिकारी प्रोडक्सन डिजाइनर रहेका छन् ।
