मिलन चाम्सको निर्देशनमा तयार भएको फिल्म ‘गोर्खा वारियर’को ‘जय जय गोर्खाली’ बोलको गीत सार्वजनिक गरिएको छ ।
गोर्खा सैनिकको बहादुरीको बखान गरिएको गीतमा राजेशपायल राईको स्वर, पूर्व आईजीपी शैलेन्द्र खनालको शब्द तथा एलिस कार्कीको संगीत छ । फिल्मभित्रको द्वन्द्वका दृश्य समावेश गरिएको गीतले फिल्मको कथा बोल्ने निर्देशक चाम्सले बताएका छन् ।
फिल्मको आगामी फागुन ५ गते धरानमा प्रिमियर गरिँदैछ । त्यसपछि पोखरामा र फागुन ९ गते काठमाडौंमा प्रिमियर गर्ने निर्देशक चाम्सको योजना छ । हिन्दी र अंग्रेजी भाषामा पनि तयार भएको फिल्मलाई अन्तर्राष्ट्रिय बजारमा एक अमेरिकी कम्पनीले वितरण गर्ने छ ।
आगामी फागुन ११ गतेबाट सार्वजनिक प्रदर्शनमा आउन लागेको यो फिल्ममा विजय लामा, रितेश चाम्स, शिशिर वाङ्देल, रेविका गुरुङ, रियर राई, सारा राई, कविता आले, सुरज तमु, विरुप गोले, सरोज खालिङ, सुमिन गुरुङ, त्रिचु राई लगायतको अभिनय छ ।
निर्देशक चाम्स र गिरीराज घिमिरेको संयुक्त लेखन रहेको फिल्मको निर्मातामा सुमन राई र सुस्मिता वाइवा छन् भने प्रशान्त थापा र राजेन्द्र घिमिरे कार्यकारी निर्माता हुन् । सुरेश राई सह-निर्मातामा छन् । फिल्ममा सुदीप बरालको डीओपी, हिमाल केसीको द्वन्द्व निर्देशन र मिलन श्रेष्ठको सम्पादन रहेको छ ।
