आर्टमान्डुले निर्माण गर्ने फिल्म ‘ऊनको स्वीटर’को फर्स्टलुक पोस्टर सार्वजनिक भएको छ । नवीन चौहानको निर्देशनमा बन्न लागेको फिल्मको पोस्टरमा विपिन कार्की र मिरुना मगर चित्रित छन् । पहिलो पुरानो ‘टेक्स्चर’मा तयार पारिएको पोस्टरमा विपिन उभिएका छन् भने मिरुना कुर्सीमा बसेकी छन् ।
पोस्टरमा ऊनको स्वीटर लगाएका विपिन हँसमुख भावमा भलाद्मी देखिएका छन् । मिरुना भने मगर पहिरनमा छिन् । पोस्टरले विपिन र मिरुना श्रीमान-श्रीमतिको भूमिकामा हुने संकेत गर्छ ।
आगामी बैशाखबाट छायांकनको तयारी गरिएको फिल्ममा विपिन र मिरुनासँगै माओत्से गुरुङ, एलेक्स विश्वकर्मा (पारस), परीक्षा लिम्बु, अनिल सुब्बा, सुरज तमु, मिलन खत्री, अरुण पुन मगर लगायतको अभिनय रहनेछ । सुजन चापागाईं र कोविद बज्रको संगीत रहने फिल्मलाई चिन्तनराज भण्डारीले खिच्नेछन् भने निर्देशक चौहानको लेखन छ ।
निर्देशक चौहानले आर्टमान्डुमार्फत ‘तीनपाते’, ‘घुमीघुमी’, ‘फूलथुंगे रानी’, ‘सुनाखरी’, ‘के माया लाग्छ र’, ‘बटौली’ लगायतका गीतको म्यूजिक भिडियो निर्माण गरिसकेका छन् । विपिनले नवीनको निर्देशनमा ‘बटौली’ र ‘घुमीघुमी’ गरी दुई गीतमा काम गरेका थिए ।
