रियलिटी शो ‘एनआरएन द सिङगर’का सेमिफाइनलिस्टहरुको टुंगो लागेको छ । प्रतियोगिताअन्तर्गत १२ जना प्रतिस्पर्धीहरु मध्येबाट अनलाइन भोट र निर्णायकहरुको मूल्यांकनबाट उत्कृष्ट १० जनाको छनोट गरिएको हो ।
उत्कृष्ट १० बाट अब ग्रान्ड फिनालेका लागि ५ जना छनोट हुने छन् । त्यसका लागि अनलाइन भोटिङ खुला भएको कार्यक्रम उत्पादक युनिटेकका सुरज राइले जानकारी दिए । आयोजकका अनुसार झापा घर भएका यूएई बस्ने भीम शेर्मा लिम्बूले उत्कृष्ट १० मा स्थान बनाएका छन् । ३६ वर्षीय लिम्बूले शिव परियारले गाएको ‘रित्तो रित्तो छु म’ भन्ने बोलको गीत प्रस्तुत गरेका थिए ।
यस्तै, काभ्रे घर भइ जापान बस्ने ३० वर्षीय कर्मा दोङ तामाङले विक्रम गुरुङको शब्द तथा अरुण थापाको स्वरमा रहेको ‘आँखाको निद खोसिएला नि’ बोलको गीत प्रस्तुत गर्दै उत्कृष्ट १० मा स्थान बनाउन सफल भए । त्यसैगरी पोर्चुगल बस्ने दाङ घर भएका सुवास चन्द्र पुन मगरलाई स्वरसम्राट नारायण गोपालको ‘सल्ला झैं आमा सुसाइ रहिन, अल्झेछ क्यारे पछ्यौरी’ बोलको गीतले टप १० मा प्रवेश गराएको छ ।
मोरङ घर भै हाल कतारमा बसोबास गर्ने लोकेन्द्र दूधराजले नारायण गोपालले गाएको ‘वीरताको चिनो’ बोलको गीत प्रस्तुत गरेका थिए । त्यसैगरी नर्वे बस्ने चितवनका विष्णु क्षेत्रीले गुलाम अलिले गाएको ‘लोलाएका दुई ती तिम्रा ठुला नयन’ बोलको गजल प्रस्तुत गर्दै अन्तिम १० मा स्थान पक्का गर्न सफल भएका थिए ।
दक्षिण कोरिया बस्ने पाँचथरको प्रदीप कोयु राइले दीपेश किशोर भट्टराईको ‘मलाई माफ गरिदेउ मेरा लोभी नजर’ बोलको गीत प्रस्तुत गर्दै आफूलाई सेमिफाइनलमा पु(याएका छन् । जर्मनी बस्ने काठमाडौंका केदार कार्कीले नारायण गोपालको गीत ‘आजै र राति के देखें सपनी मै मरी गएको’ गीत गाउँदै अन्तिम १० मा स्थान बनाए ।
यसैगरी काठमाडौं घर भएकी युके बस्ने १७ वर्षीया युक्ती बलामी, मोरङ घर भई यूएई बस्ने कृष्ण खवास र भोजपुर घर भई कतार बस्ने गुन मगर निशुले पनि अन्तिम १० मा स्थान बनाएका छन् ।अब उनीहरु उत्कृष्ट ५ मा पर्नका लागि अक्टोबर ९ सम्मका लागि अनलाइन भोटिङ खुला भइसकेको छ ।
ग्रान्ड फिनालेमा पाँच जनाबीच प्रतिस्पर्धा हुँदा सर्वाधिक भोट ल्याउनेले नै ‘एनआरएन द सिंगरको’ पहिलो उपाधि जित्ने छन् । उपाधि जित्नले नगद पाँच लाख प्राप्त गर्दा फस्ट रनरअपले दुई लाख र सेकेन्ड रनरअपले एक लाख नगद पुरस्कारका साथै ट्रफि र प्रमाणपत्र पाउने छन् ।
यही असोज २२ गते सेमिफाइनल उत्कृष्ट १० को प्रस्तुति प्रसारण गरेर फिनालेका लागि उत्कृष्ट पाँच जनाको छनोट गरिने र फिनाले घटस्थापना का दिन असोज २८ गते (अक्टोबर १५) मा काठमाडौंमा आयोजना गरिने कार्यक्रमका उपसंयोजक प्रवीण गुरुङले जानकारी दिए ।
-1741067992.jpg)
