दक्षिण भारतीय अभिनेता प्रभास, कृति सेनन र सैफ अली खान अभिनीत फिल्म 'आदिपुरुष' को दोस्रो ट्रेलर सार्वजनिक भएको छ।
मंगलबार टि-सिरिज युट्युब च्यानलमार्फत फिल्मको दोस्रो ट्रेलर सार्वजनिक गरिएको हो। सार्वजनिक ट्रेलरमा सीताहरणको प्रसंगलाई देखाइएको छ।
यसअघि सार्वजनिक गरिएको ट्रेलरमा सैफ अली खानलाई खासै स्थान दिइएको थिएन। दोस्रो ट्रेलरमा उनको रावण अवतारलाई प्रस्तुत गरिएको छ।
केही महिनाअघि फिल्मको टिजर सार्वजनिक गरिएको थियो। टिजर सार्वजनिक भएसँगै प्रशंसाभन्दा धेरै आलोचना भयो। फिल्ममा प्रयोग गरिएको भिएफएक्सका कारण धेरैले यसलाई कार्टुन, एनिमेसदेखि भिडिओ गेमसम्म भने।
त्यस्तै रावण बनेका सैफ अली खानको हुलियालाई लिएर पनि धेरै नकारात्मक टिप्पणी आएका थिए।
भिएफएक्सको गुणस्तर राम्रो नभएकाले यसमा पात्रका अनुहार, शरीरदेखि सबैजसो दृश्य एकदमै नक्कली लागेको टिप्पणी भएको थियो। सस्तो भिएफएक्समा फिल्म बनाएको भन्दै आदिपुरुषका निर्माण टोलीको आलोचना समेत भएको थियो। यसैबीच निर्माण टिमले पुनः भिएफएक्स गर्न फिल्मको प्रदर्शन मिति सारेका थिए।
हिन्दी र तेलेगु भाषामा छायांकन भएको फिल्म 'आदिपुरुष' ओम राउतले निर्देशन गरेका हुन्। यो तमिल, मलयालम, कन्नडलगायत अन्य भाषामा समेत प्रदर्शन हुनेछ।
आदिपुरुष थ्री-डी फिचर फिल्म हो। यो रामायण कथामा आधारित भएर निर्माण गरिएको छ जसमा असत्यमाथि सत्यको विजय देखाइनेछ।
यो फिलम जुन १६ अर्थात असार १ गतेदेखि प्रदर्शन हुँदैछ।
