परिवर्तन नेपालले नेपाल चलचित्र निर्माता संघका नव निर्वाचित अध्यक्ष, पदाधिकारी एवं सदस्यहरूलाई बधाई एवम् सम्मान कार्यक्रमको आयोजना गरेको छ । नेपालको सांस्कृतिक उन्नयनमा अग्रसर संस्था परिवर्तन नेपालले बुधबार काठमाडौंमा एक औपचारिक समारोहको आयोजना गर्दै नव निर्वाचित पदाधिकारीहरूलाई बधाई एवम् सम्मान गरेको हो ।
कलाकार बसुन्धरा भुसालको सभापतित्वमा आयोजित समारोहमा परिवर्तन नेपालका अध्यक्ष चलचित्रकर्मी मोहन निरौलाले स्वागत मन्तव्य राख्दै विदेशी चलचित्रको माध्यमबाट नेपालको भाषा र संस्कृतिमा आक्रमण भइरहेको विषय उठाउनुभयो । उहाँले यसलाई समयमानै सम्बोधन नगर्ने हो भने यसले भविश्यमा नेपालीहरूको अस्तितवलाई खतरा हुने जिकिर गर्नुभयो ।
नेपाल चलचित्र निर्माता संघका निवर्तमान अध्यक्ष आकाश अधिकारीले चलचित्र क्षेत्र भनेको चलचित्रकर्मीको परिवार भएको र परिवारमा आइपर्ने समस्या समाधान गर्न परिवारका सदस्यहरू एकजुट भइ लाग्नुपर्ने राय व्यक्त गर्नुभयो ।
यस्तै, निर्माता संघका नव निर्वाचित अध्यक्ष नवल खड्काले देशको संस्कृति, भाषामाथि आँच आउने कुनै पनि कुरा सह्य नहुने बताउँदै कुनै पनि चलचित्र वा निर्माताले संविधान, ऐन र नियमको उल्लंघन गर्न नपाउने धारणा व्यक्त गर्नुभयो ।
त्यस्तै, चलचित्र विकास बोर्डका पूर्व अध्यक्ष राजकुमार राईले चलचित्रसँग सम्बन्धित संघ संस्थाहरू सङ्ख्यामा धेरै हुन थाले पनि समस्याहरू पनि एकिकृत नभइ छरिएर आउन थालेको छ भन्दै एकिकृत रुपमा आवाज उठाउन चलचित्र सम्बन्धि संघ संस्थाहरूको एउटा महासंघको आवश्यकता औंल्याउनुभयो ।
समारोहमा चलचित्र पत्रकार संघका उपाध्यक्ष जीवन पराजुलीले चलचित्रकर्मिहरू भ्रम फैलाउनतिर आफैँ लाग्ने गरेको र त्यस्ता कार्यको परिणाम नकारात्मक नै हुने विचार व्यक्त गर्नुभयो ।
समारोहका सभापति बसुन्धरा भुसालले महासंघको आवश्यकता विगतमा पनि महसुस गरिएको तर केही कारणवश महासंघ गठन हुन नपाएको बताउँदै अहिले यसतर्फ गम्भीर भएर कदम उठाउनु पर्ने कुरामा जोड दिनुभयो ।
भाषिक अतिक्रमणले नेपाली चलचित्र क्षेत्रमात्रै हैन समग्र नेपाली कला, संस्कृति, सभ्यता र पहिचान र अन्ततः देशलाई समेत असर पुर्याउने धारणा सहभागी बक्ताहरूले कार्यक्रममा राखेका थिए । सस्तो लोकप्रियता, कन्टेनको विक्री तथा क्षणिक फाईदाका लागि कुनै पनि नेपालीले आफ्नो सभ्यता, संस्कृति तथा पहिचान माथि आक्रमण गर्नदिने तथा गराउने कार्य घोर निन्दनिय हुने सहभागीहरूले बताएका थिए ।
चलचित्र निर्देशक माधव राज खरेलले सहजिकरण गरेको उक्त वधाई तथा सम्मान समारोहमा नेपाल चलचित्र संघका उपाध्यक्ष गोपालकाजी कायस्थ, द्वन्द्व कलाकार संघका अध्यक्ष नारायण प्रधान, कलाकार संघका कार्यवाहक अध्यक्ष सानु ताम्राकार, प्राविधिक संघका अध्यक्ष पुष्कर लामा, चलचित्र निर्देशक समाजका पूर्व अध्यक्ष सुचित्रा श्रेष्ठ, चलचित्र पत्रकार संघका पूर्व अध्यक्ष शान्तिप्रिय, अग्रज चलचित्र पत्रकार विजयरत्न तुलाधर र प्रथम चलचित्र आमाकी अभिनेत्री भुवन चन्द र आमा चलचित्रमा आमाको शीर्षक भूमिका निर्वाह गर्ने अभिनेत्री चैत्य देवी लगायतका विशिष्ट व्यक्तिहरूको उपस्थिति थियो ।