चलचित्रको छायांकनमा फर्किइन् वर्षा

फिल्म

गृहपृष्ठ
फिल्म
चलचित्रको छायांकनमा फर्किइन् वर्षा

चलचित्रको छायांकनमा फर्किइन् वर्षा

बुधबार, माघ १२, २०७८ रंगसंसार

चलचित्र ‘जात्रै जात्रा’ रिलिजपछि अभिनेत्री वर्षा राउतले नयाँ चलचित्र साइन गर्न झन्डै एक वर्ष लगाइन् । विवाह गरेपछि चलचित्र पाउन छाडेको चर्चा समेत चल्यो । यसपछि भने उनले २०७६ सालमा ‘दुई नम्बरी’ र ‘के घर के डेरा’ चलचित्र साइन गरेकी थिइन् । उनले त्यही वर्षको फागुनमा ‘दुई नम्बरी’ को सुटिङ पनि सुरु गरिन् । तर, छायांकनकै क्रममा कोरोनाका कारण देश लकडाउन भयो ।

कोरोना महामारी फैलिएपछि रोकिएको यो चलचित्रको छायांकन दुई वर्ष हुन लाग्दा पनि पुनः सुरु हुन सकेको छैन । उनले साइन गरेको अर्को चलचित्र ‘के घर के डेरा’ को छायांकन पनि अन्योल छ । पहिलो र दोस्रो चरणको लकडाउनपछि अरु अभिनेत्रीहरुले लगातार चलचित्रमा काम गरिरहँदा वर्षाले भने चलचित्रको छायांकन गर्न पाइनन् ।

‘दुई नम्बरी’ र ‘के घर के डेरा’ को छायांकन सुरु हुने अत्तोपत्तो नभएपछि वर्षाले गत पुषमा चलचित्र ‘लाखे’ साइन गरिन् । तर, उनले चलचित्र साइन गरे लगत्तै कोरोनाको तेस्रो लहर सुरु भयो । जसले गर्दा यो चलचित्रको छायांकन पनि अन्योल बनेको थियो । तर, महामारीका बीच ‘लाखे’ को पुष अन्तिमबाट सुटिङ सुरु भएको छ । र, दुई वर्षपछि वर्षा चलचित्रको छायांकनमा फर्किएकी छन् ।

छायांकन सुरु भएको १३ दिनपछि मंगलवारबाट उनले ‘लाखे’ को सुटिङ ज्वाइन गरेकी हुन् । दुई वर्षसम्म चलचित्रको छायांकनबाट टाढा रहेकी उनलाई काममा फर्किन पाउँदाको खुसी युद्ध जितेभन्दा कम छैन । कोरोना महामारीका कारण दुई यूनिट बनाएर सुटिङ भइरहेको फिल्ममा वर्षासँगै सौगात मल्ल, अनुपविक्रम शाही, अर्पण थापा, आर्यन अधिकारी लगायतको पनि अभिनय छ ।

प्रकाशित मिति: बुधबार, माघ १२, २०७८ १५:४९

प्रतिक्रिया दिनुहोस्